Kilichofanya Wamuchomba kupokea tuzo mbili z ubora – Taifa Leo

MBUNGE wa Githunguri Bi Gathoni Wamuchomba, Jumamosi alitunukiwa tuzo mbili katika Tuzo za Jamhuri 2024 jijini Nairobi.

Mbunge huyo alituzwa kwa kuwa mbunge bora nchini Kenya na mbunge bora katika Kaunti ya Kiambu ambako eneo bunge lake linapatikana.

Akitumia anwani yake ya X, Wamuchomba alishukuru wafuasi wake kwa kusimama naye.

“Nimefurahi kupokea tuzo mbili katika Tuzo za Jamhuri jana jioni: Mbunge bora nchini Kenya na bora zaidi katika Kaunti ya Kiambu. Ushindi kwangu ni Ushindi kwa wote wanaonifuata na kuniunga mkono,” alisema.

Hii inaakisi kazi yake nzuri kama mwanasiasa na ushirikiano wake na wapiga kura katika Eneobunge la Githunguri.

Tangu kuchaguliwa kwake kuwa Bunge mwaka wa 2022, Wamuchomba ametambuliwa kwa ujasiri wake na uwazi katika uongozi na mtazamo wake kuhusu masuala ya kijamii hasa masuala ya unyanyasaji wa kijinsia (GBV).

Wamuchomba, ambaye alikuwa mwakilishi wa wanawake wa Kiambu kati ya 2017 na 2022 ameibuka kama sauti kuu ya upinzani ndani ya chama tawala cha UDA cha Kenya, bila woga akiikosoa serikali inapokosea.

Kutambuliwa kwa Wamuchomba kama Mbunge Bora katika Tuzo za Jamhuri 2024 ni thibitisho la kujitolea kwake kwa utumishi wa umma na uwakilishi mzuri wa wapiga kura wake.

Tuzo za Jamhuri hutambua michango bora ya watu binafsi na mashirika katika sekta mbalimbali, ikiwa ni pamoja na siasa, biashara na huduma kwa jamii.

Katika bunge, Wamuchomba ameshiriki katika mipango mbalimbali ya sheria inayolenga kuboresha ustawi wa Wakenya.

.